Tuesday, October 9, 2007

العيد العيد ,, الله عالعيد وليالي العيد

من قبل أيام كنا نجهز لشهر رمضان الفضيل
وألحين ما بقى شي ونودع الشهر الكريم
كل عام وانتم بخير وعيدكم مبارك وتقبل الله طاعتكم جميعا




كل ماطرالي العيد
هبت علي الذكريات
ومن هالذكريات


كانت أمي مكشختني وملبستني بدلة العيد وإمشطة شعري وتارسته شبابيص
وجنطتي الوردية اللى فيها مشطي بو منظرة و الأهم العيادي

وبما أني البنت العوده في البيت خذتني معاها بــ مشاويرها




رحنا نعيد على الجيران

ونسلم عليهم ونهنيهم بالعيد




لين وصلنا بيت ام صالح , أم صالح الله يذكرها بالخير
ما خلت أمي تطلع من عندها , فقعدوا الحريم مع بعض




وبما أن بوصالح مو موجود بالبيت يومها
خلونا بالديوانية عشان نلعب وما نزعج ضيوف أم صالح




يومها كان شعوري إني ملكة بس ناقصني مهفة الريش الوردية



ومن كثر ما كنت كاشخة كنت حاطه حمرة وكحل "
وأحنا البنات الحمرة بالصغر
تعنيلنا الكثير :> وأهمها الشعور بالنضج
"


المهم


رحت مع عيال أم صالح الديوانية
وكانوا صبيين وبنت والى يومكم هذا أذكرهم عدل ومو ناسيتهم

مادري شقصتهم معاي
من ييت معاهم وأهما كارهيني ومنبطه جبودهم



بنت ام صالح : جم عطوج عيادي
أنا " بدلع ومط بالكلمة " : عطوني فلوس وايــــد
ولد أم صالح : ورينا لو انتي تقولين الصج
أنا : مابي
بنت أم صالح : هه هه هه يالجذابه

أنا : أنا مو جذابه



ما أشوف إلا ولد أم صالح الكبير يحاول يخمط جنطتي مني

وأنا بكل قوة أعضه حيييل على إيده


وياليتني ما طبعت الساعة على إيده




طقوني طق وإغسلوا إشراعي بالديوانية
اعفسوني من فوق لي حدر
بجيت وصارخت ومحد سمعني
وأهما ثلاثتهم إنقضوا علي مثل الضباع



باقوا الجم بيزة اللى عندى
وإطلعوا ركض من الديوانية



تميت أنا أذرف دموع الطق اللى أكلته
وحيدة بالديوانية


لين طل علي واحد من ربع بوصالح الله يرحمه


قال لي : يبا اشفيج تبجين ؟
أنا " أشهق من البجي " : باقوووووو مشطييييييي ,, باقوووووو عيديتيييييييي
رفيج بوصالح : بس يبا لا تبجين



فج بوكه وعطاني دينارين وكانوا من أغلى الدنانير
ونستني العيدية وخففت علي المهانة اللى تعرضت لها
و وقفت بره بالحديقة


ليما أمي يت

وأول ماشافتني


إخترعت من الكحل اللى صار مثل خريطة السعودية بويهي


وقالت لي منو مسوي فيج جذي


قلت لها اللى صار


وأنا على بالي إنها بتاخذ بثاري وبترد عياديي


قالت لي ميخالف يمه سامحيهم احنا بالعيد ولازم نستانس ونفرح


أنا حزتها انقهرت حدي


شسامحهم فيه ,,, طقوني وناموا بمرداني , أقوم أسامحهم بارده مبرده :/
هزلت



ما أنسى هاليوم أبد
والذكريات كثيرة وحلوة



عيدكم مبارك
وعساكم من عواده


والعيادي مطلوبة من كل المدونين الموظفين
:>
بس مانبي أرباع






الدنيا

68 comments:

Selezya said...

بخ

Selezya said...

لوول
يارب عسا هالذكريات الحلوه ماتغيب عن بالج وتنعاد عليج وانتي بصحه وعافية


وعيدج مبارك يالغالية وكل عام وانتي بخير
ونستينا بهالذكريات
بس حرره عياديي قبل اكثر منج لوول
لا لان انا عكسج
من عمري وابوي ياخذني وياه الدوانيات فماشالله العيادي من الرياييل وايد ودايم كنت اكثر وحده احصل وايد عيادي لول
والله وناسه لو بس ابوي يرد وياخذني وياه الدوانيات اخ بس ياليت

انا طالبة .. تطالبيني بعيديه ولا انا اللي اطالبج؟
اعتقد انا اللي اطالبج
لوول
وعلى قولتج
مو ارباع
:p
thaaaaanx 7bebty

نواف الأرملي said...

الدنيا مرحبا ومقدما عيدك مبارك
الله يهداك عاضته لاوطابعتله ساعه بعد وماتبينه يكرهك :)

mtfa2el said...

كل عام و انتي بخير و ينعاد عليج بالصحة و العافية
شالموقف ما سوى عليج بيت أم صالح
خوش إكرام حق الضيف
بس أكيد أمج قالتج تكبرين و تنسين الله يا كنت أكره هالكلمة
لووول

U_SF said...

أيامج سعيده وكل عام وانتي بخير

الذكريات لووول .. عجييييبه^_^

Anonymous said...

LooooL! Weee ba3ad 3omry wallaah .. bs walla khosh thekrayaat ma gasssar il shayyib sakkitach ib denaraain lol =p

Q80 Blogger said...

لوووووول

اي شكو تتفلسفين وتقولين عندي عيادي وايد
لا وبدلع مثل ماتقولين

وعيدج مبارك

أبوسويلم said...

اولا
عود حميد اختى الكريمة ولو انك طولت الغيبة شوية
ثانيا
انا كان ول ام صالح اخد العيدية منك فانت كمان ما سبتيهوش وعملتيله ساعة محترمة فى ايده
وبعدين الدينارين احلى من اى شىء ساعتها
ولا ايه؟
عموم
عيدك مبارك
وعساك من عواده
والسلام

Unknown said...

انا اقول كل عام وانتي بخير وعيدج مبارك :)

فريج سعود said...

زيين صار عندنا مطقوقة جنه مو كافي مطقوق
عيدج مبارك وكل عام وانتي بالف خير
شوفي رفيجتج سيليزية
تقول عسا هالذكريات تنعاد عليج
لوووول
الظاهر ان شافتج بالعيد بتغسل شراعج نصيحة روحي لها بدون عيادي او قوليلي لها ناسية بوكي
:)

Anonymous said...

yallah may khalef...alkareem ysame7 :)


bas sij eqahart 3alaich wallah...I hate it when kids team up against one kid....sij mo shay :/


ow 3eedaich mbaraaaaak sweetie

Anonymous said...

hhhhhhhhhhhhhhhhhhhhhhhhhhhh
i love ur blog

عاجـل said...

بوكي ضايع بمخباتي

نون النساء said...

ههههههههههه
شنو ضحكت على سالفة باقوا مشطيييييي باقوا عيديتي..
اتخيلت المنظر شلون قايل


ويييه انا ماكو دلع بطفولتي
كله كفخ ومكافخ مع الصبيان
عايشتها كأني صبي




اما عالعيدية لج دينار مو ربع شقلتي
:P

5roofa said...

looooooooooool

وااي تونس القصه لوول حبيتها و امبي صج قهر لوول انا لو مكانجاسوي فضيحه و ما اسكت لين ياخذون بثاري لووول

عيدجمباارك
:D

salamz sweetee...

Najmah said...

loooooool

كل عام وانتي بخير وعيدج مبارك بالغالية :)

قبل العيد غير
ذكرياته ماتنّسي

واحنا نطالبج عيدية مو بس عيال أم صالح تعطينهم =d

mowa6en said...

في البدايه عيدج مبارك أخت دنيا .

ثقافه قديمه جميلة
بسيطة ولها شجونها .

بس عجبتني

charisma said...

عيدج مبارك
وتقبل الله طاعتج
من عواده ان شاءالله
:)

ReLaaaX said...

عيدج مبارك :)))

عطينا حسابج خنحول لج ;p

---
تصدقين آنه انقهرت مع ان اللي صار له سنين وبنين :p

حمد said...

عيدج مبارك

وعساكم من العايدين الفايزين

Q8DOLL said...

ههههههههههههه
الله يقطع ابليسج
فضحتينا
الحمره تعني لنا الكثير اي والله صاجه
بس نحطها ما ناكل ولا حتى نضحك نخاف تخترب
ذكرتينا بالطفوله المشرده

Q8DOLL said...
This comment has been removed by the author.
Q8DOLL said...

وي من كثر الضحك على الدبغه اللي أكلتيها من ولد ام صالح نسيت اقولج عيدج مبارك

ويييييييييي
وافشلتاه
العيديه ترقع الموقف ؟؟

بنت الكويت said...

عيدج مبارك

كل عام وانتي بخير :*

حسام بن ضرار said...

عيدك مبارك


و كل عام و انت بألف خير

Anonymous said...

أول شي
عيدك مبارك وتقبل الله منك صالح الاعمال
بعدين وين نحط العيادي
لازم تحطين لنا صندوق نقط فيه العديه
اذا مافي أحد في المدونه

vancouver said...

وي
خنت حيييييلي

وينهم
بس
وانا امعطهم من خدودهم
عشانج
لما يردون العيدية


المجرمين الاشراااااااار
هههههه



عيدج مباااااااااااارك
وذكريااات تضحححك وبس حلوة

حد القلم said...

عيدك مبارك اختي و كل عام و انتي بخير

اما بالنسبة للموقف فلو كنت انا مكان الوالدة و واحد تحرش ببنتي و لو ياهل و الله ازرده و اعلقه بالشبة ، بنتي هذي مو اي شي

انتي طبيتي بغلطة انج ما بكيتي بويه الوالدة حار بحار و احرجتي ام صويلح و بعدين ليش نطرتيها برة .. ؟

انا صارت لي مواقف كذي وايد خذلوني فيها الاهل ليما تعودت اخذ حقي بايدي و صار عندي مبدا ان اي طفل يواجه نفس هالمواقف اني اصف معاه و انتف ريش الي حاشه

عموما انصح ان تنسين هالموقف لانه مؤلم حيل و يثير المواجع لكن لا تنسين الاشخاص

و بالنهاية كل عام و انتي بخير

salfa3ajeeba said...

3eedich mbarak wi 3sach min il3aydeen wi ilfayzen inshala ya aldenya wi taqabbal allah 6a3tich,

9ara7ah ma gassarti 3la tifigidich ilblog wana '3ayba trani walla walaht 3leech:*

دكتور كسلان said...

كل سنة وانت طيبة


عيد سعيد

الزين said...

عيدج مبارك وتقبل الله طاعتج

Anonymous said...

عيدكم مبارك وعساكم من العايدين الفايزين

enter-q8 said...


عيدك مبارك
و كل عام و انتم بخير
وتعودنه بالصحه و العافية
و الكويت بخير

Aldenya said...

Selezya
هلا والله بكل الغلا
وانتي بخير وصحة وسلامة
لا تحريني بعياديج قبل
الحين أنا موظفة
:>
أوزع عيادي :>
تعالى بيتنا ولج مني عيدية



\
/
\

الأرملى
هلا وغلا فناننا
بصراحة
كانت العضة دفاع عن النفس
وأهما اللى بدوا :/
يسعدني حضورك جدا يا استاذ



/
\
/

mtfa2el
تكبرين وتنسيين
اوووووه
أعمارنا وصلت الألف وليلحين هالكلمة تنقال :>
وكل عام وأنت بألف خير


/
\
/


U_SF
وأنت بخير وصحة وسلامة
والذكريات
ما تنسي خصوصا لي كانت قوية :>

Aldenya said...

Very.Q8ya
هههههههههههههههههههه
اي والله
سكتني بدينارين
:>



/
\
/


Q8i_Blogger
مو المقرود طول عمرة مقرود لو شنو يسوي
وهذا حظي أيامها
شنسوى :>
وأيامك سعيدة




/
\
/


أبو سويلم
يا حيالله بأخوي بوسويلم
تشكرات على الترحيب
والدينار أيام هالسالفة كانت بنظري ميتين دينار
" منور "


/
\
/



Mishari
أيامك سعيدة يامشاري
وكل سنه وأنت طيب :>


/
\
/


فريج سعود
كلنا إنظقينا
بس دلوقتي
لا :>
إتصدق إني ما إنتبهت على ما ترميه سيليزيا :>
عاد مساع اقو لها بعطيج عيديه
شكلي
حزت الحزة
بنحاش :>
وحياك الله وكل سنه وانت طيب

Aldenya said...

Ghasheema
لا لا لا
انا مو كريمة
طقوني وباقوني وأسامحهم
مايصحش :p~
كانوا عصابة شريرين :>
وكل سنه وانتى طيبة


/
\
/


Anonymous
مشكور/ه
:>



\
/
\


عاااااااجل
من ألحين يالجعص
:P
خلاص
مانبي عيديه :>


/
\
/



نون النساء
هلا وغلا باللى نورت البلوق
يا حبي حق سعاد حسني
ذكرتيني بمشهد يوم كانت مسوية نفسها بنت صغيرة
وراحت تأدي دور تمثيل عند رشدي أباضة
يا حلاتها
:>
وخلاص بنقبل الدينار
مشكورة :>


/
\
/

خروفة
هلا وغلا بكل الغلا
أيامج سعيدة
عاد تدرين
كنت أبي آخذ بثاري
بس ماقدرت :/

Sara said...

لوووووووووووووول يالدنيا موتيني من الضحك حرام والله كسرتي خاطري انا لو منج اعضهم كلهم

ماحب هالحركات

:) الله يعوضج انشالله

عيدج مبارك وعساج من عواادة :)

Aldenya said...

Najmah
اي والله
قبل الذكريات تختلف
حتى الوناسة كانت تختلف
ولج مني عيدية
واعيال ام صالح
باقوني ماعطيتهم برضاي :>



/
\
/

moowa6en
يا هلا ومرحبا
منور البلوق يا مواطن
أيامك سعيدة
والذكريات لها الف معنى ومعنى
شاكرتلك لحضورك


/
\
/


charisma
أيامج سعيدة
ومشكورة على تهنئتج يالغالية


/
\
/


ريلاكس
يا هلا ومرحبا بالوردية
بعد عمري بتحولين لي
هاج رقم احسابي
0i0l0o0e000y0o0u0
عاد فجي الرمز
ومن القلب ترى
:>


/
\
/



حمد
أيامك سعيدة يا أخوي
وكل سنة وانت طيب

ما علينا said...

كل سنة وانت طيبة
وبالف خير
وربنا يتقبل منك ان شاء الله
صالح الاعمال

بصراحة تخيلت الموقف معك
وتمنيت لو كنت معاكي
كنت مسحت لك بيهم الارض

لكن يللا المسامح كريم
وبعين انت بدأت بالعض

لكن هم كمان بداوا بمحاولة الاستيلاء على عيديتك

من حقك ما تنسيش اليوم دا

كل سنة وانت بالف خير

Aldenya said...

Q8DOLL
العيدية مو بس رقعت الموقف
إلا غيرت الجو
وإقلبت البجي الى شاقة الحلج :>
عاد الحمره
أهم شي يكون لونها أحمر
تحسين صرتي ازقرت ومره
وهذا الأهم
وكل سنة وانتى بخير
وعساج من عواة



/
\
/


بنت الكويت
يا حيالله بمن حبا ودبا وركب القليلبا
أيامج سعيدة يالغالية
مشتاقين لج


/
\
/


حسام بن ضرار
وانت بخير وصحة وسلامه
وعساك من الفايزين والعايدين


:>


/
\
/


الذيب
مو مشكلة أعطيك رقم الحساب :>
وكل عام وأنت بخير
وعساك من العايدين والفايزين


/
\
/


vancouver
لو كنتي معاي يومها
جان صرنا ضحيتين من ضحايا العيد
وتسلمين يالغالية
وكل سنة انتى طيبة

Aldenya said...

إبن زيدون
وينك حزتها
عشان تنتفهم وتغسل اشراعهم
إتصدق
خليتني أعيد التفكير بمسألة
ليش أمى ما دافعت عني وردت حقي حزتها :/
@@
:<
هل من المقول انها ... لا لا لالا ماني مكملة
:>

وانا نطرتها بره ... ليش ؟؟ مادري والله
بس يمكن الدينارين كانوا مأثرين علي حزتها :>

وكل سنه وانت طيب وعساك من عوادة


/
\
/


salfa3ajeeba
هلالالالالالالالالالالالا والله
هلالالالالالالالالالالا باللى لها وحشة
فقدتج يا سالفة
وكنتى دووووم في بالي
وبلوقج
كان بعيوني
وسامحيني على القصور
وكل سنه وانتي بخير يالغالية


/
\
/


دكتور كسلان
وانت طيب وعساك من العايدين والفايزين
:>



\
/
\


ZoZOta
أيامج سعيدة وانتي بصحة وعافية :>



/
\
/

حمودي
وانت بخير وصحة وسلامة
وعساك من عوادة


/
\
/


Enter-Q8

آمين يارب
وعساك من العايدين والفايزين :>

Aldenya said...

سارونه
هلا وغلا بالسهرانه
ياليتج كنتى معاي وأخذتي بثاري
:>
وكل سنة وانتى حلوة يا حلوة



/
\
/


ما علينا
هلا وغلا
طولتي الغيبة عندنا
من زمان ما زرتيني :>

وكل سنة وانتى طيبة وعيدج مبارك
واللى طقوني مستحيل
انساهم
:/

الله كريم

تــــ(حـنة)ــــر said...

عيد سعيد
كل لحظة
وكل دقيقة
وكل ساعة
وكل يوم
وكل اسبوع
وكل شهر
وكل سنة
وكملي انتى الباقي بقى
المهم كل سنة و انتى بالف خير و سلامة
ضيفة جديدة
تحياتى
تمر حنة

Aldenya said...

تمر حنة
يا هلا ومرحبا فيج
دنتي منورة الحته :>
كلامج وايد حلو ولج بالمثل بالضبط
وسعيدة جدا لوجودج في المدونة

Brilliant said...

كل عام و أنتم بخير... و تقبل الله طاعتكم

Shaima'a Alkandari said...

ياعيني على هالذكريات العجيبه

فعلا مواقف كثيره تمر بالعيد لمن كنا يهال

يعطيج العافيه وعيدج مبارك

وضحكتيني على سالقتج

7osen said...

كل عام وانتي بخير

وعيدج مبارك

وعساج من عواده

Mamloo7a Q8ia said...

تقبل الله طاعتج
وعيدج مبارك

david santos said...

Hello, friend! I passed here for desiring to much health and a GOOD WEEKNED

Aldenya said...

Brilliant


وأنت بخير وصحة وسلامة
وعساك من العايدين والفايزين



/
\
/


Shaima'a Alkandari
لكل وقت ذكرى
يا تكون حلوة يا مره
وهذا من اللى حصل لي من الذكريات
وعيدج مبارك وعساك من عوادة



/
\
/



7osen

وانت بخير وصحة وسلامة
وكل عام وانت بخير :>


/
\
/


Mamloo7a Q8ia
وطاعتج يالغالية
وكل سنة وانتى بخير


/
\
/


david santos
Thank u

Mr-Mohd said...

اول شي اقولج كل عام وانتي بخير بمناسبة حلول عيد الفطر السعيد

ثانيا ، انتي سالفتج سالفه مع ذكريات العيد خصوصا هالموقف اللي ما ينسي

فعلا العدوان الثلاثي الضبعاني لا ينسى

بس ميخالف المهم صارلج موقف اذا ذكرتيه تبتسمين


ويا حلاة الحياة مع المواقف المضحكه خصوصا الحرجه منها


على طاري العيادي ، عطيني رقم حسابج وانا احولج عيديتج
بس ها انا مو مسؤول اذا لقيتي رصيدج مصفر ومسحوب كله @@ والسبه العيدية



تحياتي لج

someone_q8 said...

عيدج مبارك وعساج من العيدين والفايزين

و سلامات ماتشوفين شر من مقلب الصغر :)

تــــ(حـنة)ــــر said...

سعدت بتشريفك
كل سنة و انتى طيبة
و عيد سعيد على الأمة الأسلامية كلها
و يارب يسعدك و يباركلكم فى عيلة ام صلاح

White Wings said...

يا حلو سوالفج
كل عام وأنت بخير غاليتي
أنا بالعيد كان محد يقرب مني، دلوعة الى درجة ثقل الدم وأمي ما ترضى علي
:)

san3a_wa_laken said...

عيدج مبارك وعساج من عواده

kafrawy said...

كل سنة و انتى طيبة

و الامة العربية بخير


وع فكرة انا مش معاى ارباع خالص

Anwar Al-Ballam said...

لووووووووول يالله هاردلك
العاده يقولون تكبر وتنسى
بس الظاهر انج مانسيتي
لووووول

DARK said...

كل سنة وانتى طيبة
عيد مبارك
اعذرينى اللهجة الخليجة شوية صعبة عليا

الوجد said...

كل عام وانتي بخير


وعساك من عواده


ذكريات العيد كثير حلوة

امتعتينا فيها

عيون الحب said...

هههههههه لين الحين القلب مانسى؟؟
لوووووووووووووول

والله موقف شي بس ذكرى مؤلمة ههههههه
الحمدلله رجعتي سليمه وهذا المهم

كل عام وانتي بصحة وسلامة
وينعاد عليج طاقة مو مطقوقة هههههه

Fahad Al Askr said...

عيدك مبارك، وعذرا على التأخير، لكن يبقى اليوم عيد أيضا

Desert cat said...

كل سنة وانتى طيبة
عيدك مبارك
وعاسكى من عواده

Barrak said...

كل عام وانتي بخير

اووف
طلعتي وانتي صغيره تعظّين لايحووووووووشك

FAHAD said...

اختي شكرا على رد السلام اللي حطيتيه بمدونتي
بس بصراحة انصدمت لاني توني مسوي المدونة مادري شلون دشيتي علي
عموما شكرا وان شاء الله راح ابدأ بانشاء المدونة بمجرد ما اعرف الطريقة
اخوج:محامي
http://m7aamy.blogspot.com/

Tamer Nabil Moussa said...

السلام عليكم


كل سنة وانتى طيبة


ربنا يكرمك ويوفقك

تحياتى

Aldenya said...

q8cool
ههههههههههه
ذكرى لا تنسى
أصلا ليلحين أتذكر عوار راسي يوم مجعوا شعري :/
واذا تبي رقم حسابي
عشان العيديه أو النصيبية :p~
خلص العيد
ووزعنا عيادي وما عطوني :/
مشكلة اذا توظفنا :>


/
\
/

someone_q8
وانت بخير وصحة وسلامة
المقالب كثيرة بالصغر
بس بعضها ما يزول :>


/
\
/

تمر حنه
افا عليج
انتي تستاهلين الخير كله
وكل سنة وكل يوم وانتى طيبة


/
\
/

White Wings
يا هلا والله بدلوعة الماما
لو كنتي بموقفى
أمج خذت بثارج
أما أنا مع انى البجر خلوني والحسرة بقلبي
":<
على الرغم انى بعد حبيبة امي وصديقتها :>

/
\
/

san3a_wa_laken
وانتي بخير وصحة وسلامة :>

Aldenya said...

كفراوى
اونت بخير :>
المره دي حــ سامحك وأعديها
المرة الثانية لازم تييب معاك
شكرا لحضورك :>


/
\
/


Anwar Al-Ballam
يقولون
تكبر وتنسى
بس من الطق اللى أكلته
ما نسيته
طبع بقلبي :>



/
\
/


DARK
وأنتي طيبة يا دارك
معليش اللهجة الخليجية صعبة
بس وجودك يكفيني ويسعدني وايد

:>


/
\
/

الوجد
يا هلا بالغالية الغايبة الحاضرة
فقدتج بصراحة
ومريت عليج أتفقد أحوالج
والحمدلله انج طمنتيني بوجودج
:>

/
\
/

عيون الحب
ههههههههههههههههه
عجبتني
" طاقة مو مطقوقة "
عاد تدرين ما أقدر أطق
لو شنو وضعي أحس إني ما أقدر أسويها
ولا جان ما طقوني شلة الضباع :/

Aldenya said...

Fahad Al Askr
يا هلا والله
وانت بخير
وايام الله كلها عيد :>


/
\
/

Desert cat
وانتى بخير
وصحة وسلامة
سعيده جدا بحضورج بمدونتي
شكرا جزيلا لج :>


/
\
/

Barrak
يمكن العض كانت الوسيلة الوحيدة اللى قدرت أرد فيها إعتباري

:>


/
\
/


FAHAD
يا حيالله بمن زارنا
انا دريت عن مدونتك بالصدفة
كنت داشة بلوق ما أذكر أي بلوق
فــ طقيت
Next Blog
وانت طلعت وحاط السلام عليكم
ورديت السلام :>
وهذي الحكاية
وان شاءالله عن قريب نقرا مواضيعك :>

/
\
/

Tamer Nabil
أهلا وسهلا
وانت بخير وصحة وسلامة
ويارب يوفقك ويسعدك :>