العيد العيد ,, الله عالعيد وليالي العيد

من قبل أيام كنا نجهز لشهر رمضان الفضيل
وألحين ما بقى شي ونودع الشهر الكريم
كل عام وانتم بخير وعيدكم مبارك وتقبل الله طاعتكم جميعا

كل ماطرالي العيد
هبت علي الذكريات
ومن هالذكريات

كانت أمي مكشختني وملبستني بدلة العيد وإمشطة شعري وتارسته شبابيص
وجنطتي الوردية اللى فيها مشطي بو منظرة و الأهم العيادي

وبما أني البنت العوده في البيت خذتني معاها بــ مشاويرها

رحنا نعيد على الجيران

ونسلم عليهم ونهنيهم بالعيد

لين وصلنا بيت ام صالح , أم صالح الله يذكرها بالخير
ما خلت أمي تطلع من عندها , فقعدوا الحريم مع بعض

وبما أن بوصالح مو موجود بالبيت يومها
خلونا بالديوانية عشان نلعب وما نزعج ضيوف أم صالح

يومها كان شعوري إني ملكة بس ناقصني مهفة الريش الوردية

ومن كثر ما كنت كاشخة كنت حاطه حمرة وكحل " وأحنا البنات الحمرة بالصغر
تعنيلنا الكثير :> وأهمها الشعور بالنضج "

المهم

رحت مع عيال أم صالح الديوانية
وكانوا صبيين وبنت والى يومكم هذا أذكرهم عدل ومو ناسيتهم
مادري شقصتهم معاي
من ييت معاهم وأهما كارهيني ومنبطه جبودهم

بنت ام صالح : جم عطوج عيادي
أنا " بدلع ومط بالكلمة " : عطوني فلوس وايــــد
ولد أم صالح : ورينا لو انتي تقولين الصج
أنا : مابي
بنت أم صالح : هه هه هه يالجذابه
أنا : أنا مو جذابه

ما أشوف إلا ولد أم صالح الكبير يحاول يخمط جنطتي مني

وأنا بكل قوة أعضه حيييل على إيده

وياليتني ما طبعت الساعة على إيده

طقوني طق وإغسلوا إشراعي بالديوانية
اعفسوني من فوق لي حدر
بجيت وصارخت ومحد سمعني
وأهما ثلاثتهم إنقضوا علي مثل الضباع

باقوا الجم بيزة اللى عندى
وإطلعوا ركض من الديوانية

تميت أنا أذرف دموع الطق اللى أكلته
وحيدة بالديوانية

لين طل علي واحد من ربع بوصالح الله يرحمه

قال لي : يبا اشفيج تبجين ؟
أنا " أشهق من البجي " : باقوووووو مشطييييييي ,, باقوووووو عيديتيييييييي
رفيج بوصالح : بس يبا لا تبجين

فج بوكه وعطاني دينارين وكانوا من أغلى الدنانير
ونستني العيدية وخففت علي المهانة اللى تعرضت لها
و وقفت بره بالحديقة

ليما أمي يت

وأول ماشافتني

إخترعت من الكحل اللى صار مثل خريطة السعودية بويهي

وقالت لي منو مسوي فيج جذي

قلت لها اللى صار

وأنا على بالي إنها بتاخذ بثاري وبترد عياديي

قالت لي ميخالف يمه سامحيهم احنا بالعيد ولازم نستانس ونفرح

أنا حزتها انقهرت حدي

شسامحهم فيه ,,, طقوني وناموا بمرداني , أقوم أسامحهم بارده مبرده :/
هزلت

ما أنسى هاليوم أبد
والذكريات كثيرة وحلوة

عيدكم مبارك
وعساكم من عواده

والعيادي مطلوبة من كل المدونين الموظفين
:>
بس مانبي أرباع

الدنيا

سهـامٌ تـُفـتـت روحـي

.

.

في هذه الايام إستعمر كياني إحساس ,, مختلف

كئيب وحزين

.

.

.

شعور صعب حينما أحس بأن هذا العالم يسدل الستارة بوجهي
رغم أني أتبوأ المقاعد الأولى
أنتظر بدء قصة ,, ظروف الوقت هي من شَكلها و رتبها

وزرع شوكًا في أضلعي

.

.

.

شعور صعب حينما أصرخ وأتألم
وأبث شكواي لكل من أراه وأحادثه
أدمر فيهم بساتين كانت خضراء
وأبدل بياض دنياهم بسواد قاتم كحزن سماء ليله لا نجم فيها أو قمر
لا أعلم لــّم أفعل هذا
فجرحي لا أتحمله
إلا بانتزاعه من فؤادي

.

.

.

آهات تنطلق بلا شعور
فالحياة عندي بلا ألوان
وبلا طعم كالماء
أنسدل كنهر هاديء يبكي
باكية على نفسي الضائعة
على جرحي العميق
الذي يكبر خلسة في داخلي
كسنبلة نمت فــ اصفرت كمعالم مشاعري
واختفت أحاسيسي ,, بل هربت
لا تريدني
ولا أعلم تحت أي غطاء تبيت الآن

.

.

.

آهــــ يا جروح هذا الزمن
يا طعنة مغروسة في فؤادي
إمحيني معك علني أطيب

.

.

.

الدنيا

ذكرياتي عن رمضان

ذكرياتي في رمضان

/

\

/

أتذكر كنا نلحق بعض أنا وخواتي وأخواني ونشوف شفايف بعض واللى شفايفة لونهم وردي يعني هذا فاطر بنظرنا

واللى لون إلسانه أحمر مو أبيض هذا قرنتي ماكل وشارب

\

/

\

أتذكر إنه كان مطبخنا صغير ,, فكنا كلنا نقعد على الأرض ونسوي مع أمي فطاير لحم وجبن وكنا نحس إنه إنجاز كبير يخلينا نسولف حق رفيجاتنا عنه

\

\

\

أتذكر إن أمي كانت تقومنا غصب عشان إنتسحر ونقوم وعيونا فيها النوم فكانت تسوي لنا على السحور

بيض وطماط دايما وشنو السر مادري

\

/

\

أتذكر أمى كانت تقول لى ,, إذا عطشتي روحي تمضمضي بالماي ,, فكنت أتمضمض وأخلى شويه بحلجي عشان أبلعة وكنت أكرر هالحركة كل ما عطشت ,, ياترى صيامي كان مقبول ؟ :>

\

/

\

أتذكر كنا أنا وخواتي ننطر أذان المغرب عشان نطالع وراه البباي

أتذكر عبدالله البحري وعبدالله البري

أتذكر دانيا وعمو وحيد

أتذكر بيل وسباستيان ورنا

أتذكر كنت أتابع مسلسل أرابيسك مع أمي وخواتي

\

/

\

أتذكر قبل الفطور

أبوي كان ياخذنا معاه بالسيارة وكل واحد فينا بإيده صينيه دائرية عليها الأكل الحار

وكانت ريولنا تحترق بس كنا نخاف نقول حق أبوي شي

ومن نوصل إلى مسيد المخيزيم يكون يانا الفرج

\

/

\

أتذكر إني نسيت أهنيكم بقدوم هذا الشهر الفضيل

كل عام وأنتوا بخير

وتقبل الله منا ومنكم صالح

والله يعوده عليكم كل سنه بالخير

الدنيا

أنـ ـ ـ ـــا رديـ ـــ ــت

أنا رديت

أنا رديت لعيونك أنا رديت

ولك حنيت مثل ما يحن حمام البيت

أحبك حب يا روحي ما حبه أبد إنسان

ما أغبّي وأقول أهواك ما أغبّي

ما أغبي شكثر ولهان ما أغبي

ولعيونك أنا رديت أنا رديت

قزر عمري أسولف فيك ولا أتعب

وكل منك وكل ما فيك غصب ينحب

على خدك يا نوّير الربيع زاهي

نظر عينك طفل عن دنيته ساهي

يا علّك ما نسيتيني

يا علّك كثر حبي تحبّيني

أنا وإن طالت الغربة

أرد لك وأسبق سنيني

منساك منساك لو مهما جرى

منساك منساك يا أنس روحي وغربتي

وعيونك الحلوة ترى

آخر محطة بدنيتي منساك

http://www.salmiya.net/songs/abdelkareem/ram/abdelkareem137.ram

الدنيا